Errenteriako Andra Mari Abesbatzak hiru emanaldi garrantzitsu eskainiko ditu Alfredo Kraus Auditorioan Las Palmas de Gran Canarian bertako abonu kontzertuen baitan eta Granadako Nazioarteko Jaialdi ospetsuaren barruan. M.Carmen Garmendia, Andra Mari Kultur Elkarteko presidenteak, Jose Manuel Tife, Andra Mari Abesbatzaren zuzendariak eta Iñigo Salaberria, Andra Mari Kultur Elkarteko presidente-ordeak aurkeztu dituzte, gaur, Donostiako Koldo Mitxelena Kulturunean, ekainaren amaieran eta uztailaren hasieran Kanarietan eta Granadan Errenteriako abesbatzak egingo dituen emanaldiak.
Errenteriako Andra Mari Abesbatzak 70 ahotsez osatutako korua eramango du kontzertu garrantzitsu hauetara. Ekainaren 26an Las Palmas hirian eta uztailaren 1an Granadan Pedro Halffterrek zuzendutako Kanaria Handiko Orkestra Filarmonikoarekin abestuko du eta uztailaren 3ko emanaldian Victor Pablo Perezek zuzendutako Galiziako Orkestrarekin abestuko du. Hiru emanaldietan errepertorio berria eta berariaz prestatutakoa abestuko du Andra Mari Abesbatzak.
Hiru abestaldi hauek erakusten duten moduan, Errenteriako Andra Mari Abesbatza punta -puntako korua da, horren haritik aurtengo apirilaren 9an Galiziako Orkestra Sinfonikoaren abonu programazioaren baitan abestu zuen eta Donostiako Musika Hamabostaldian emanaldia izango du, aurten ere. Hori gutxi balitz, abesbatza nagusiaren harrobia den Andra Mariren Orereta Abesbatzak uztailean Txinan egingo den Word Choir Games 2010eko munduko abesbatzen olinpiadetan parte hartuko du.
Ekainaren 26an, Las Palmas hiriko Alfredo Kraus auditorioan, Kanaria Handiko Orkestra Filarmonikoaren abonu denboraldiaren barruan izango du Andra Mari Abesbatzak emanaldia. Jose Manuel Tiferen zuzendaritzapean, Errenteriako Abesbatzak Pedro Halffter zuzendari duen orkestrarekin, Elena de la Merced sopranoarekin, Maria Jose Montiel mezzosopranoarekin, eta Josep Miquel Ramón baritonoarekin, Wagner-en (Parsifaleko Karfreitagszaube edo Ostiral Santuko sorginkeria) , Manuel de Fallaren eta Ernesto Halffteren (Atlantida-ko Suita ) eta Ginasteraren (Panambí) errepertorioa abestuko du.
Las Palmaseko egitarau bera eskainiko du Andra Mari Abesbatzak Granadako Nazioarteko Musika Jaialdiaren barruan uztailaren 1ean eskainiko duen kontzertuan. Granadako Jaialdiak bere 59. aldia du aurtengoa eta Hego Amerikako errepubliken independentziaren bigarren mendeurrena gai hartuta, Ameriketara zabalduko da. Horren bidetik datoz Alhambra gazteluko Carlos V. Jauregian Andra Mari Abesbatzak eskainiko dituen bi emanaldiak.
Uztailaren 3an izango da hauetako bigarrengoa eta Errenteriako Andra Mari Abesbatzak Victor Pablo Perezen zuzendaritzapean joko duen Galiziako Orkestra Sinfonikoarekin abestuko du. Atlantikoaren bi itsas hegitan sortutako eta joan-etorria egin duten eta kontzertu bertsioan eskainiko diren bi zarzuelak osatuko dute programa: Geronimo Gimenez andaluziarraren musika eta Julian Romearen libretoa duen La Tempranica zarzuela, eta itsasoaren bestaldetik etorri zen Cecilia Valdes , Gonzalo Roig kubatarraren musika eta Agustin Rodriguez eta Jose Sanchezen libretoa duen zarzuela. Eta hori abesteko lehen mailako bost bakarlari izango dituzte lagun: Maria Bayo, sopranoa; Jose Manuel Zapata, tenorea; Emilio Sanchez, tenorea; Carlos Bergasa, baritonoa eta Marina Rodriguez Cusi , mezzosopranoa.
Errenteriako Andra Mari Abesbatzaren ordezkariek azpimarratu dutenez, erronka eta aukera dira emanaldi hauek. Lan asko eskatzen dutenak eta halaber abesbatza sendotu eta indartzen dutenak. Kanarietako Orkestra Filarmonikoaren musika denboraldian debutatzeak, bertako abonuko kontzertuen barruan eta Granada bezalako Jaialdi batean partaide izatea, eta, gainera, bi programekin eta egungo orkestra, zuzendari eta bakarlari onenetako batzuekin, guretzat -eta Euskal Herriko abesbatzentzat- oso garrantzitsua da.
ESKARMENTU HANDIKO TALDEA
Andra Mari Abesbatzarekin batera, Andra Mari Kultur Elkartea honako hauek osatzen dute: gazteen korua den Oinarri Abesbatzak, ETBko Oh Happy Day! saioaren lehen irabazlea, eta haur koruak diren Orereta Txiki eta Orereta Abesbatzek.
Errenteriako Andra Mari Abesbatza 1966an Jose Luis Ansorenak sortu zuen, sari ugari irabazi izan ditu lehiaketetan eta antzoki eta jaialdi garrantzitsuetan aritua da: Madrilen, Bartzelona, Sevillan, Tenerifen, Malagan, Pereladako jaialdian, Santanderreko jaialdian, Donostiako Hamabostaldian, Bilboko Opera Denboraldian eta beste hainbat lekutan. Suitza, Belgika, Italia, Austria, Frantzia, Portugal, Argentina eta beste hainbat herritan zehar burutu ditu birak.
Orkestra askorekin batera aritu da, horien artean: Euskadiko Orkestra Sinfonikoa, Bilboko Orkestra Sinfonikoa, Espainiako Orkestra Nazionala, Scottish Chamber Orchestra, Buenos Aireseko Filarmonikoa, Cadaquesko Orkestra, Madrileko Sinfonikoa, Türingen Philharmonie Orchester, XVIII. Mendeko Orkestra, Galiziako Orkestra, Tenerifeko Orkestra, etab Enrique García Asensio, Odón Alonso, Maximiano Valdés, Frans Brüggen, Nicholas Kramer, Jesús López Cobos, Leopold Hager, Andreas Mitisek, Paul Daniel, Carlo Rizzi, Doron Salomon, David Robertson, Antonio Ros Marbá, Juanjo Mena, Victor Pablo Perez, Stefano Ranzani, Jean-Claude Malgoire, Andrés Orozco-Estrada eta Andrei Boreyko maisuen zuzendaritzapean, besteak beste.
10 LP eta 8 CD grabatzeaz gain, era guztietako koru-musika lantzen du, horien artean opera eta zartzuela antzeztuak. Euskal Musika lantzea da bere berezitasunik nagusiena.
Jose Luis Ansorenak bultzatuta, Andra Mari Abesbatzak 1973an Musikaste, Errenteriako Musika Astea eta 1974an ERESBIL, Musikaren Euskal Artxiboa sortu zuen.
